बसस्टॉप या चित्रपटाचे परीक्षण - समीर परांजपे, दै. दिव्य मराठीच्या वेबसाइटवरील मराठी कट्टा सेगमेंट - २१ जुलै २०१७

दै. दिव्य मराठीच्या वेबसाइटवरील मराठी कट्टा सेगमेंटसाठी बसस्टॉप या नव्या चित्रपटाचे मी केलेले हे परीक्षण. त्या लेखाची वेबलिंक मी पुढे दिली आहे.
http://divyamarathi.bhaskar.com/…/BOL-REV-REV-movie-review-…
---
Movie Review : कथेचा कोणताही स्टॉप नसल्याने गुंत्यात हरवलेला 'बसस्टॉप'
- समीर परांजपे | Jul 21, 2017, 14:42 PM IST
---
चित्रपट - बसस्टॉप
रेटिंग- 2 स्टार
कलावंत - अमृता खानविलकर, अनिकेत विश्वासराव, हेमंत ढोमे, सिद्धार्थ चांदेकर, पूजा सावंत, रसिका सुनील, अक्षय वाघमारे, सुयोग गोरे, अविनाश नारकर, संजय मोने, शरद पोंक्षे, उदय टिकेकर, विद्याधर जोशी
कथा, पटकथा , संवाद , दिग्दर्शक - समीर हेमंत जोशी
संगीत - सौरभ, जसराज आणि ऋषिकेश
निर्मिती - श्रेयश जाधव
श्रेणी- फॅमिली ड्रामा 
--
आजच्या युवकांची विचार करण्याची पद्धत, त्यांना असलेली जबाबदारीची जाणीव ही अनेक प्रसंगात दिसते. पण युवकांमध्ये उथळपणा, बेजबाबदार वृत्ती, बेदरकारपणाही आढळतो. या त्यांच्या गुणदोषांचा एकत्रितपणे विचार करुन त्यांच्या आधीच्या पिढ्यांनी म्हणजे त्यांचे आई-वडील, आजी-आजोबांनी या युवकांना नीट समजून घ्यायचे असते. त्याचबरोबर वडीलधारी माणसे आपल्याला नीट काही गोष्टी समजावून सांगत असतील तर त्या नीट ऐकून त्यातील चांगल्या गोष्टी अंगी बाणविण्याचे भान युवकांनी दाखवायला पाहिजे. हे दोन पिढ्यांतील जे सामंजस्य आहे ते कसे साधले जावे यावर भाष्य करणारा चित्रपट म्हणजे बसस्टॉप.
कथा 
एका कॉलेजमधील तरुण मुले-मुली. त्यात देवेन हा अभ्यासू, प्रामाणिक असून अनुष्का नावाच्या मुलीवर प्रेम करत असतो. अनुष्काही त्याच्या प्रेमात असते. बाबांची लाडकी असणारी अनुष्का सर्व मर्यादा सांभाळून वागणारी, नीट शिक्षण घेऊन करिअर घडविण्यावर भर असलेली सरळ रेषेत आयुष्य जगण्यावर विश्वास ठेवते. याच कॉलेजातील किशोर या तरुणाला अभ्यासात आणि शिक्षणातही विशेष रस नाही. पैशाच्या व्यवहारातही तो चालू असतो. एकापेक्षा अधिक मुलींना आपल्या प्रेमात पाडणे, फ्लर्टिंग करणे हा त्याचा आवडता उद्योग. त्याचे वडील 'आबा' ही त्यामुळे त्रस्त झालेले आहेत. विनित हा त्याच कॉलेजमधील अजून एक विद्यार्थी. तो ज्या मुलीवर प्रेम करतो ती शरयू नंबर एकची बिलंदर मुलगी आहे. शरयूचे बाबा मेघराज हे कडक शिस्तीचे आहेत. शरयू घरातून निघते तेव्हा पंजाबी ड्रेस घालून निघते. पण बाहेर गेल्यानंतर वेस्टर्न आउटफिट्समध्ये वावरते. शरयू मुलांबरोबर फ्लर्टिंग करते. त्यांच्याशी प्रेम करण्याचे नाटक करते. या मुलांकडून पैसे उकळते व मौजमजा करते. विनित हा शरयूवर मनापासून प्रेम करत असतो. शरयूला गिफ्ट देण्यासाठी तो वडिलांच्या वस्तू चोरुन विकतो. तिला एकदा आयफोनही भेट म्हणून देतो. विनित हा शरयूसाठी फक्त 'कामापुरता मामा' असतो. सुमेध या तरुणाचे मैथिलीवर मनापासून प्रेम आहे. पण ते बहुतेक एकतर्फी आहे असाच सगळा माहोल आहे. मैथिलीचे वडिल गोविंद हे प्रागतिक विचारसरणीचे आहेत. आपल्या मुलीने सारासार विचार करुन निर्णय घ्यावेत, स्वत:चा योग्य जीवनसाथी तिने स्वत:च शोधावा यासाठी ते तिला नेहमी प्रोत्साहन देत असतात. गोविंद (मैथिलीचे वडील), आबा (किशोरचे वडील), मेघराज (शरयूचे वडील), सतीश (अनुष्काचे वडील) हे चौघेजण आपल्या मुलांवर नियंत्रण राहावे, त्यांनी आपल्या संस्कार व मर्यादेत राहावे म्हणून प्रयत्न करत असतात. त्यांच्या या प्रयत्नांना त्यांची मुले किती प्रतिसाद देतात? या चित्रपटात ज्या जोड्या आहेत त्यापैकी किती जणांचे प्रेम सफल होते? आधीची पिढी व युवा पिढी यांच्यामध्ये जी जनरेशन गॅप आहे ती दरी कमी करण्यासाठी पालक व त्यांची मुले पुढाकार घेतात का? या दोन पिढ्या खरच एकमेकांना समजून घेण्यात यशस्वी होतात का? असे काही प्रश्न निर्माण होतात. त्यासाठी हा चित्रपट पाहायला हवा. 
अभिनय 
बसस्टॉप हा मराठीतील मल्टिस्टारर चित्रपट आहे. त्यात अमृता खानविलकर (शरयू), अनिकेत विश्वासराव ( देवेन), हेमंत ढोमे- (किशोर), सिद्धार्थ चांदेकर (विनीत), पूजा सावंत (अनुष्का) ,रसिका सुनील (मैथिली), अक्षय वाघमारे (अभिषेक), सुयोग गोरे ( सुमेध), अविनाश नारकर ( गोविंद - मैथिलीचे वडील), संजय मोने (जितूभाई), शरद पोंक्षे (आबा -किशोरचे वडील), 
उदय टिकेकर (मेघराज - शरयूचे वडील), विद्याधर जोशी (सतीश - अनुष्काचे वडील) यांनी चांगली कामगिरी केली आहे. पण या चित्रपटात एकाच वेळेला तीन-चार कथानके सुरु असल्याने तसेच मुलांच्या चार वडीलांचीही समांतर कहाणी सुरु राहिल्याने एक वेळ अशी येते की, कथेचा गडबडगुंडा होऊन प्रेक्षक भांबावून जातो. बसस्टॉप चित्रपट पाहाताना कथेचा नेमका स्टॉप कोणता हे प्रेक्षकाला लक्षात राहिनासे होते. 
दिग्दर्शन 
समीर हेमंत जोशी हे तर खरे कसलेले दिग्दर्शक. त्यांनी युथफुल व मल्टिस्टारर चित्रपट करण्याच्या दृष्टीने कलाकारांची केलेली निवड योग्यच होती. या युथची जीवनशैली दाखविण्याचा दिग्दर्शकाचा प्रयत्नही प्रामाणिक आहे पण या चित्रपटात इतकी पात्रे आहेत की दिग्दर्शकाला त्यातील बरीच पात्रे व्यवस्थित पडद्यावर फुलविता आलेली नाही. दोन पिढ्यांतील गॅपची गोष्ट सांगताना, ती गॅप मिटवण्यासाठीच्या प्रयत्नांचे चित्रण दाखविताना हा चित्रपट दिग्दर्शकाच्या हातून निसटला आहे. खूप तरुण कलाकार असले म्हणजे चित्रपट प्रसन्न व युथफूल होतोच असे नाही. प्रश्न उभे करुन त्याची उत्तरे शोधता शोधता हा चित्रपटच कथानकाच्या गुंत्यात अडकून प्रेक्षकांसमोर एक मोठे प्रश्नचिन्ह निर्माण करतो. आयुष्यात अनेक बसस्टॉप येतात, जिथे आपण थांबतो, दुसरी बस पकडतो किंवा कधी चुकीची बस पकडतो. पण योग्य बसस्टॉपला उतरणे हे देखील महत्वाचे असते. प्रत्येकाच्या विशेषत: तरुणांच्या आयुष्यातील थांब्यांची पर्यायाने बसस्टॉप्सची ही कहाणी मनाला भावत नाही हेच खरे.
संगीत 
या चित्रपटातील युथफुल गाणी हा प्लस पॉइंट आहे. त्याचे श्रेय हृषिकेश, सौरभ-जसराज आणि आदित्य बेडेकर या नव्या दमाच्या संगीतकारांना आहे. `मूव्ह ऑन', `आपला रोमान्स', `घोका नाही तर होईल धोका' आणि `तुझ्या सावलीला' ही गाणी तरुणाईला भुरळ घालणारी आहेत. हृषिकेश-सौरभ-जसराज या त्रिकुटाने संगीतबद्ध केलेले `मूव्ह ऑन' हे गाणे वैभव जोशी यांनी लिहिले असून रोहित राऊत आणि प्रियांका बर्वे या जोडीने ते गायले आहे. तसेच क्षितीज पटवर्धन लिखित आणि श्रुती आठवले व जसराज जोशीच्या आवाजातले `आपला रोमान्स' हे गाणे देखील तरुणाईलाही आवडण्यासारखे आहे. आदित्य बेडेकरने संगीत दिग्दर्शित केलेले योगेश दामले लिखित `तुझ्या सावलीला' आणि `घोका नाहीतर होईल धोका' या गाण्यांपैकी रुपाली मोघे आणि सागर फडके या जोडीने `तुझ्या सावलीला' या गाण्याला स्वरसाज चढवला असून, `घोका नाहीतर होईल धोका' हे गाणे सागर फडके याने गायले आहे.