फास्टर फेणेच्या पुस्तकांची ऑडिओ बुक्स लवकर भेटीला...समीर परांजपे. दै. दिव्य मराठी, २५ सप्टेंबर २०१७

दिव्य मराठीच्या दि. 25 सप्टेंबर 2017च्या अंकात प्रसिद्ध झालेली व मी केलेली ही विशेष बातमी. या बातमीची लिंक व मजकूर पुढे दिला आहे.
http://m.epaperdivyamarathi.bhaskar.com/aur…/…/25092017/0/4/
--
फास्टर फेणेच्या पुस्तकांची ऑडिओ बुक्स लवकर भेटीला...
- समीर परांजपे
मुंबई, दि. 25 सप्टेंबर - `फास्टर फेणे' हा या मराठी चित्रपटाचा टिजर यूट्युबवर झळकला आणि फास्टर फेणेच्या भूमिकेत अमेय वाघ शोभून दिसेल या विषयावर सोशल मिडियामध्ये उदंड चर्चा सुरु झाली. फास्टर फेणेच्या चित्रपटाची हवा तयार झाली असताना दुसऱ्या बाजूला परदेशातील काही फास्टर फेणेप्रेमी फास्टर फेणेवर भा. रा. भागवत यांनी लिहिलेल्या पुस्तकांचे ऑडिअो बुक करण्याची योजना आखत आहेत.
यासंदर्भात भा. रा. भागवत यांचे पुत्र रवि भागवत यांनी `दिव्य मराठी'ला सांगितले की, विदेशातील काही फास्टर फेणेप्रेमींची अशी इच्छा आहे की, फास्टर फेणेवरील पुस्तकांचे ऑडिओ बुकमध्ये रुपांतर करावे. यासंदर्भात त्यांच्याशी बोलणी सुरु असून आताच सर्व माहिती उघड करता येणार नाही. या मंडळींशी फास्टर फेणेवरील किती व कोणत्या पुस्तकांचे ऑडिओ बुकमध्ये रुपांतर करायचे याबद्दल सध्या माझी चर्चा सुरु आहे.
फास्टर फेणेवर एक मराठी अॅनिमेशन फिल्म सिरिजही तयार होणार होती. त्यासाठी चार वर्षांपूर्वी काही जणांनी रवि भागवतांशी संपर्क साधला होता. मात्र त्या मंडळींकडून पुढे त्याबाबत काही न झाल्याने ही अॅनिमेशन फिल्म बनविण्याचा प्रकल्प अजूनही प्रत्यक्षात आलेला नाही.
फास्टर फेणेवर भा. रा. भागवत यांनी जितकी पुस्तके लिहिली होती त्यातील बहुतांश पुस्तके त्यांनीच प्रकाशित केली होती. त्यानंतर २००१मध्ये ही पुस्तके पुण्याच्या उत्कर्ष प्रकाशनने प्रसिद्ध करण्यास सुरुवात केली. यासंदर्भात उत्कर्ष प्रकाशनच्या सूत्रांनी सांगितले की, काही महिन्यांपूर्वी भा. रा. भागवतांनी फास्टर फेणेवर लिहिलेल्या २० पुस्तकांचा संच आम्ही प्रकाशित केला आहे. लहान मुलांना फास्टर फेणेविषयी अजूनही आकर्षण असल्याने या पुस्तकांना मागणीही चांगली आहे. फास्टर फेणेवरील या २० पुस्तकांच्या संचाची किंमत १२०० रुपये इतकी आहे. त्यामध्ये फुरसंुगीचा फास्टर फेणे, आगे बढो फास्टर फेणे, बालबहाद्दूर फास्टर फेणे, जवानमर्द फास्टर फेणे, फास्टर फेणेचा रणरंग, ट्रिंग ट्रिंग फास्टर फेणे, फास्टर फेणेची एक्स्प्रेस कामगिरी, फास्टर फेणे टोला हाणतो, फास्टर फेणेची काश्मिरी करामत, प्रतापगडावर फास्टर फेणे, गुलमर्गचे गुढ आणि फास्टर फेणे, चिकुचे जाळे आणि फास्टर फेणे, फास्टर फेणेची डोंगरभेट, फास्टर फेणेच्या गळ्यात माळ, चक्रीवादळात फास्टर फेणे, चिकू, िचंपाझी आणि फास्टर फेणे, विमानचोर विरुद्ध फास्टर फेणे, जंगलपटात फास्टर फेणे, टिक टॉक फास्टर फेणे, फास्टर फेणे डिटेक्टिव्ह अशी वीस पुस्तके आहेत.
फास्टर फेणेची लोकप्रियता लक्षात घेता या पुस्तकांचे इंग्रजीत रुपांतर होणे गरजेचे होते. त्यादृष्टीने बाळ उर्ध्वरेषे व शांता पुराणिक यांनी फास्टर फेणेच्या सहा पुस्तकांचा केलेला इंग्रजी अनुवाद उत्कर्ष प्रकाशनने प्रसिद्ध केला असून पुस्तकरुपात ग्रंथदुकानांत व इ-बुक स्वरुपात बुकगंगा या साइटवरही उपलब्ध आहे. या पुस्तकांनाही चांगली मागणी असल्याचे उत्कर्ष प्रकाशनच्या सूत्रांनी सांगितले.
फास्टर फेणेवर बनली होती १९८३ साली मालिका
फास्टर फेणेवर डीडी नॅशनल चॅनेलवर १९८३ साली फास्टर फेणे ही मालिका सुरु झाली होती. त्यात फास्टर फेणेची भूमिका सुमीत राघवन याने केली होती. या मालिकेला अनेक वर्षे झाली तरी त्या मालिकेची अनेकांच्या मनात असलेली आठवण अजूनही कायम आहे.