-----------
पाकिस्तानचे नापाक इरादे
------------
- समीर परांजपे
----------------
पाकिस्तानी दहशतवाद्यांनी ११ सप्टेंबर रोजी पूंछ १८ सप्टेंबर रोजी उरी येथे भारतीय लष्करावर जे हल्ले चढवले त्यामुळे पाकिस्तानविषयी भारतात तीव्र संताप निर्माण झाला होता. त्याचीच परिणती २९ सप्टेंबरच्या मध्यरात्री भारतीय लष्कराने पाकिस्तानी हद्दीत शिरून सर्जिकल स्ट्राइक करण्यात तेथील दहशतवाद्यांना कंठस्नान घालण्यात झाली. या घटनाक्रमानंतर या दोन देशांतील वाढलेला तणाव अजूनही कमी होण्याची चिन्हे नाहीत. ही पार्श्वभूमी लक्षात घेऊन पाकिस्तानच्या कलाकार, गायक, तंत्रज्ञांना भारतीय चित्रपटांत कामे देण्यावर इंडियन मोशन पिक्चर प्रोड्युसर्स असोसिएशनने बंदी घातली. त्याला प्रत्युत्तर म्हणून पाकिस्तानने भारतीय चित्रपट प्रदर्शित करण्यावर तसेच भारतीय मालिका, संगीताचे कार्यक्रम पाकिस्तानी दूरचित्रवाहिन्यांवरून प्रसारित करण्यावरही बंदी घातली. गेल्या ६९ वर्षांतील पाकिस्तान भारताच्या संबंधांमध्ये अनेक चढउतार आले आहेत. काही युद्धेही झाली आहेत. या युद्धांमध्ये भारताकडून आपला कायमच पराभव झाला हा सल पाकिस्तानला नेहमी बोचत असतो. तो सध्या तणावाच्या काळातही तीव्रतेने दिसत आहे. शस्त्रसंधीचा, दोन्ही देशांमध्ये झालेल्या कराराचा पाकिस्तानने नेहमीच भंग केला आहे. सध्याच्या तणावाच्या दिवसांत पाकिस्तानी लष्कराची मजल मंगळवारी काश्मीरमधील पूंछ भागातील बालाकोट भाग सांबा जिल्ह्यातील सीमावर्ती भागात भारतीय नागरी वस्त्यांवर गोळीबार करण्यापर्यंत गेली. या कृत्याबद्दल पाकिस्तानी लष्कराला भारतीय लष्कराने चोख प्रत्युत्तर दिले असले तरी दिवाळीच्या दिवसांतच अशा पद्धतीने मुद्दामहून नागरी वस्त्यांवर हल्ले करण्यामागे पाकिस्तानचा निश्चितच कुटिल हेतू होता. सोमवारीही पाकिस्तानने भारतीय हद्दीतील लष्करी चौक्या नागरी वस्त्यांवर केलेल्या हल्ल्यात एक जवान महिला ठार झाले होते, तर काही जवान जखमी झाले होते.
भारताने सर्जिकल स्ट्राइक केल्यापासून पाकिस्तानकडून भारतीय हद्दीत होणाऱ्या गोळीबाराच्या घटनांत वाढ झालेली आहे. भारताने पाकिस्तानची प्रत्येक आघाडीवर चाणाक्षपणे कोंडी करायला प्रारंभ केल्याने त्या देशाचे सत्ताधारी लष्कर अस्वस्थ आहे. पाकिस्तानचे नाक दाबण्यासाठी सिंधू नदीचे पाणी हे मोठे हत्यार भारताच्या हाती आहे. काश्मीरमधील दहशतवाद्याचा युवा नेता म्हणून गौरव करणारे पाकिस्तानचे पंतप्रधान नवाझ शरीफ यांचे संयुक्त राष्ट्रांमधील भारतविरोधी भाषण सपशेल फसले होते. भारताने केलेल्या सर्जिकल स्ट्राइकचे अमेरिकेनेही एक प्रकारे समर्थनच केल्याने पाकिस्तानच्या अंगाचा तिळपापड झाला होता. आंतरराष्ट्रीय राजकारणात आपली उपद्रवशक्ती दाखवण्याची संधी दहशतवाद्यांना आश्रय देणाऱ्या पाकिस्तानसह काही देशांनी वारंवार साधली आहे. त्याचाच पुन:प्रयोग म्हणून गेल्या दोन दिवसांपासून काश्मीर भागात नागरी वस्त्यांवर पाकिस्तानी लष्कर हल्ले चढवत अाहे. त्याच्या आडून दहशतवाद्यांना भारतात घुसखोरी करण्यासाठी मदत करायची हा पाकिस्तानचा नेहमीचा पवित्रा काश्मीरच्या सीमावर्ती भागात लावलेल्या कॅमेऱ्यांमुळे उघडकीस आला. तेथेही पाकिस्तान उघडे पडले.
सीमेवरती या कारवाया सुरू असताना पाकिस्तानचे हस्तक भारतातील विविध प्रांतांतही सक्रिय झाले होते त्यांना पाकिस्तानच्या भारतातील दूतावासाकडून मदत मिळत होती. पाकिस्तानातील दूतावासातील एक कर्मचारी महमूद अख्तर याला भारतीय लष्कराशी संबंधित संवेदनशील माहिती असलेल्या कागदपत्रांसह ताब्यात घेण्यात आले. त्यानंतर त्याला भारत सोडून जाण्याचा आदेश सरकारने दिला. या कारवाईबद्दल पाकिस्तानने नेहमीप्रमाणे कांगावा केला तरी सत्य उजेडात आल्याशिवाय राहिले नाही. पाकिस्तानी गुप्तचर संस्था आयएसआयमधून महमूद प्रतिनियुक्तीवर पाकिस्तानच्या भारतातील दूतावासात आला होता. तो मूळचा पाकिस्तानी लष्करातील बलुच रेजिमेंटमध्ये हवालदार पदावर कार्यरत होता. महमूद अख्तरने भारतीय तपास यंत्रणांना दिलेल्या माहितीनुसार त्याच्या या हेरगिरीमध्ये पाकिस्तानी दूतावासातील अजून चार अधिकाऱ्यांचा सहभाग असल्याची माहिती पुढे आली होती. आता या चारही अधिकाऱ्यांना मायदेशी बोलावण्याचा विचार पाकिस्तानने चालवला आहे.
पाकिस्तानला चोख प्रत्युत्तर देण्यासाठी त्यांच्यावर बीएसएफच्या जवानांनी गेल्या ११ दिवसांत पाच हजार तोफगोळे डागले आहेत ३५ हजारांहून अधिक गोळ्या डागल्या आहेत. या कालावधीत पाकिस्तानने ६० वेळा शस्त्रसंधीचा भंग करण्याचे प्रकार घडले. या सगळ्यांतून एक गोष्ट स्पष्टपणे जाणवते की भारतातील पाकिस्तानच्या कारवाया यापुढील काळातही वाढत जातील. भारताने आता अधिक सतर्क राहणे आवश्यक आहे.
(paranjapesamir@gmail.com
