दै. दिव्य मराठीच्या दि. 15 आँगस्ट 2017च्या अंकात प्रसिद्ध झालेली व मी केलेली ही विशेष बातमी. या बातमीचा मूळ मजकूर, वेबपेज लिंक व जेपीजी फाइल सोबत दिली आहे.
http://m.epaperdivyamarathi.bhaskar.com/aur…/…/15082017/0/7/
---
मराठी चित्रपटात काम करण्याचा सध्या तरी विचार नाही - वहिदा रहेमान
http://m.epaperdivyamarathi.bhaskar.com/aur…/…/15082017/0/7/
---
मराठी चित्रपटात काम करण्याचा सध्या तरी विचार नाही - वहिदा रहेमान
`आरती' हा नवा मराठी चित्रपट बनविण्यासाठी दिग्दर्शिका सारिका मेनेला दिले वहिदा यांनी प्रोत्साहन
- समीर परांजपे
मुंबई, दि. 15 ऑगस्ट - मी सुमारे सात भाषांतून काम केले आहे. सध्या अतिशय चांगले कथानक व आशय असलेले मराठी चित्रपट येत आहेत.काही वर्षांपूर्वी मराठी चित्रपटामध्ये काम करण्याबद्दल मला एका गृहस्थांनी विचारणा केली होती पण ते त्यावेळी काही जमले नाही. सध्या मराठी चित्रपटांत काम करण्याविषयी अजून तरी मला कोणी विचारलेले नाही. मी ही त्याबाबत काहीही ठरविलेले नाही असे प्रख्यात अभिनेत्री वहिदा रहेमान यांनी `दिव्य मराठी'शी बोलताना सांगितले.
वास्तव घटनेवर `आरती' हा नवा मराठी चित्रपट बनविण्यासाठी दिग्दर्शिका सारिका मेने यांना वहिदा रहेमान यांनी खूप प्रोत्साहन दिले होते. त्यामुळे या चित्रपटासंदर्भात प्रसारमाध्यमांशी वहिदा रहेमान यांनी मंगळवारी संवाद साधला. त्यानंतर `दिव्य मराठी'शी बोलत होत्या.
गाईडमध्ये आपण साकारलेली `रोझी' ही बंडखोर होती. गेल्या काही वर्षांत प्रदर्शित स्त्रीवादी सिनेमे मुख्यत: स्त्री दिग्दर्शकांनीच दिग्दर्शित केले आहेत. त्याबद्दल काय वाटते? सध्याच्या हिंदी चित्रपटांत दाखविली जाणारी बंडखोर स्त्री ही तुम्ही साकारलेल्या रोझीची पुढची आवृत्ती आहे असे वाटते का? या प्रश्नाला उत्तर देताना वहिदा रहेमान म्हणाल्या की, गाईड चित्रपट १९६५ रोजी झळकला. म्हणजे त्या घटनेला आता ५२ वर्षे पूर्ण झाली. इतक्या वर्षांपूर्वी बनविलेल्या गाईडची कथा त्या काळाच्या मानाने खूपच प्रागतिक व पुरोगामी होती. गाईडमधील नायिका रोझी आपल्या पतीला सोडते. साऱ्या बंधनातून मुक्त होते. राजू गाईडबरोबर राहायला लागते. रोझीमध्ये होत असलेले हे परिवर्तन बघताना ते कुठेही सवंग वाटत नाही. याचे श्रेय सर्वस्वी दिग्दर्शकाला द्यायला हवे. आज फिर जिने की तमन्ना है हे गाईडमध्ये रोझीच्या तोंडी असलेले गाणे हे भारतीय चित्रपटातील पहिले फेमिनिस्ट गाणे आहे. रोझी ज्यावेळी पडद्यावर आली तेव्हा समाजात इतकी मोकळीक नव्हती. आजच्या चित्रपटांमधील नायिका खूपच बोल्ड आहे. ती काळानूसार जाणारी आहे. मला आज सिनेमात दिसणारी स्वत्वाची जाणीव असलेली नायिका ही गाईडच्या रोझीचेच नेक्स्ट व्हर्जन वाटते.
माझा गाईड हा सर्वात आवडता चित्रपट आहे. मी देव आनंद यांच्याबरोबर सहा तर दिलीपकुमार यांच्या बरोबर चार चित्रपट केले. तसेच सुनील दत्त, मनोजकुमार, अमिताभ बच्चन अशा आणखी नायकांबरोबरही मी कामे केली आहेत. पण सर्वात आवडते नायक विचाराल तर मला देव आनंद जास्त आवडतात. राज कपूर हे अभिनेत्यापेक्षा दिग्दर्शक म्हणून अधिक श्रेष्ठ होते. दिलीपकुमार हे अभिनेते म्हणून लाजवाबच व सर्वश्रेष्ठच आहेत असेही वहिदा रहेमान यांनी `दिव्य मराठी'शी बोलताना पुढे सांगितले.
आरतीला वहिदा रहेमान यांनी आपले नाव उघड न करता केली वैद्यकीय उपचारांसाठी आर्थिक मदत व आरतीवर मराठी चित्रपट बनावा म्हणून दिग्दर्शिकेला दिले प्रोत्साहन...
दिग्दर्शिका सारिका मेने हिचा सख्खा भाऊ सनी पवार व सनीची मैत्रिण आरती यांची वास्तव कथा आरती या चित्रपटात गुंफण्यात आली आहे. २००६ सालची गोष्ट अाहे. आरती आपल्या मित्रमैत्रिणींबरोबर ठाणे जिल्ह्यातील उत्तन येथे सहलीला गेली होती. ती ज्या गाडीतून प्रवास करत होती त्या गाडीला अपघात झाला. त्यात पुढच्या सीटवर बसलेल्या आरतीच्या मेंदूला मार लागला. ती बेशुद्ध झाली. त्यानंतर काही वेळ पुन्हा शुद्धीत आली. सनी व त्याच्या घरच्यांना आरतीच्या अपघाताबद्दल कळताच ते तातडीने भाईंदरला धावले. तिथे स्थानिक रुग्णालयात आरतीवर उपचार सुुरु असताना आरती परत कोमात गेली. तिला जसलोक रुग्णालयात हलविण्यात आले. तिथे ती सहा महिने कोमात होती. त्यावेळी सनी पवार हा रात्रंदिवस तिच्यासोबत होता. आरतीची मनोभावे शुश्रूषा करुन मैत्रीचे नाते निभावत होता. ती कोमातून त्यानंतर बाहेर आली तेव्हा तिच्या स्मरणशक्तीवर परिणाम झाला होता. आरतीची अवस्था दोन वर्षांच्या बाळासारखी होती. अशा अवस्थेत ती सुमारे साडेतीन वर्ष जगली. त्या सर्व काळात सनी पवार तिच्या सोबत सावलीसारखा राहिला. आरतीवर उपचार चालू असताना तिच्या स्थितीबद्दल वृत्तवाहिन्यांवरुन वहिदा रहेमान यांना माहिती मिळाली. त्यांनी सनी पवारला दूरध्वनी करुन अारतीच्या उपचारांसाठी आर्थिक मदत देण्याची इच्छा व्यक्त केली पण आपण कोण बोलतोय हे वहिदा रहेमान यांनी सनी पवार कधीही कळू दिले नाही. वहिदा रहेमान यांच्याकडून नियमितपणे आरतीवरील उपचारांसाठी विशिष्ट आर्थिक मदत मिळत होती. आरतीचे निधन झाल्यानंतर वहिदा यांना खूपच वाईट वाटले. त्यांनी ज्यावेळी गरीब व गरजू लोकांना मदत करण्यासाठी मिनिम ही संस्था सुरु केली त्यावेळी त्यांनी आवर्जून सनी पवारला मदतीसाठी आपल्या सोबत घेतले. सनी पवार व आरती यांच्यावर आरती हा मराठी चित्रपट बनविण्यास वहिदा रहेमान यांनीच दिग्दर्शिका सारिका मेने हिला प्रोत्साहन दिले.
- समीर परांजपे
मुंबई, दि. 15 ऑगस्ट - मी सुमारे सात भाषांतून काम केले आहे. सध्या अतिशय चांगले कथानक व आशय असलेले मराठी चित्रपट येत आहेत.काही वर्षांपूर्वी मराठी चित्रपटामध्ये काम करण्याबद्दल मला एका गृहस्थांनी विचारणा केली होती पण ते त्यावेळी काही जमले नाही. सध्या मराठी चित्रपटांत काम करण्याविषयी अजून तरी मला कोणी विचारलेले नाही. मी ही त्याबाबत काहीही ठरविलेले नाही असे प्रख्यात अभिनेत्री वहिदा रहेमान यांनी `दिव्य मराठी'शी बोलताना सांगितले.
वास्तव घटनेवर `आरती' हा नवा मराठी चित्रपट बनविण्यासाठी दिग्दर्शिका सारिका मेने यांना वहिदा रहेमान यांनी खूप प्रोत्साहन दिले होते. त्यामुळे या चित्रपटासंदर्भात प्रसारमाध्यमांशी वहिदा रहेमान यांनी मंगळवारी संवाद साधला. त्यानंतर `दिव्य मराठी'शी बोलत होत्या.
गाईडमध्ये आपण साकारलेली `रोझी' ही बंडखोर होती. गेल्या काही वर्षांत प्रदर्शित स्त्रीवादी सिनेमे मुख्यत: स्त्री दिग्दर्शकांनीच दिग्दर्शित केले आहेत. त्याबद्दल काय वाटते? सध्याच्या हिंदी चित्रपटांत दाखविली जाणारी बंडखोर स्त्री ही तुम्ही साकारलेल्या रोझीची पुढची आवृत्ती आहे असे वाटते का? या प्रश्नाला उत्तर देताना वहिदा रहेमान म्हणाल्या की, गाईड चित्रपट १९६५ रोजी झळकला. म्हणजे त्या घटनेला आता ५२ वर्षे पूर्ण झाली. इतक्या वर्षांपूर्वी बनविलेल्या गाईडची कथा त्या काळाच्या मानाने खूपच प्रागतिक व पुरोगामी होती. गाईडमधील नायिका रोझी आपल्या पतीला सोडते. साऱ्या बंधनातून मुक्त होते. राजू गाईडबरोबर राहायला लागते. रोझीमध्ये होत असलेले हे परिवर्तन बघताना ते कुठेही सवंग वाटत नाही. याचे श्रेय सर्वस्वी दिग्दर्शकाला द्यायला हवे. आज फिर जिने की तमन्ना है हे गाईडमध्ये रोझीच्या तोंडी असलेले गाणे हे भारतीय चित्रपटातील पहिले फेमिनिस्ट गाणे आहे. रोझी ज्यावेळी पडद्यावर आली तेव्हा समाजात इतकी मोकळीक नव्हती. आजच्या चित्रपटांमधील नायिका खूपच बोल्ड आहे. ती काळानूसार जाणारी आहे. मला आज सिनेमात दिसणारी स्वत्वाची जाणीव असलेली नायिका ही गाईडच्या रोझीचेच नेक्स्ट व्हर्जन वाटते.
माझा गाईड हा सर्वात आवडता चित्रपट आहे. मी देव आनंद यांच्याबरोबर सहा तर दिलीपकुमार यांच्या बरोबर चार चित्रपट केले. तसेच सुनील दत्त, मनोजकुमार, अमिताभ बच्चन अशा आणखी नायकांबरोबरही मी कामे केली आहेत. पण सर्वात आवडते नायक विचाराल तर मला देव आनंद जास्त आवडतात. राज कपूर हे अभिनेत्यापेक्षा दिग्दर्शक म्हणून अधिक श्रेष्ठ होते. दिलीपकुमार हे अभिनेते म्हणून लाजवाबच व सर्वश्रेष्ठच आहेत असेही वहिदा रहेमान यांनी `दिव्य मराठी'शी बोलताना पुढे सांगितले.
आरतीला वहिदा रहेमान यांनी आपले नाव उघड न करता केली वैद्यकीय उपचारांसाठी आर्थिक मदत व आरतीवर मराठी चित्रपट बनावा म्हणून दिग्दर्शिकेला दिले प्रोत्साहन...
दिग्दर्शिका सारिका मेने हिचा सख्खा भाऊ सनी पवार व सनीची मैत्रिण आरती यांची वास्तव कथा आरती या चित्रपटात गुंफण्यात आली आहे. २००६ सालची गोष्ट अाहे. आरती आपल्या मित्रमैत्रिणींबरोबर ठाणे जिल्ह्यातील उत्तन येथे सहलीला गेली होती. ती ज्या गाडीतून प्रवास करत होती त्या गाडीला अपघात झाला. त्यात पुढच्या सीटवर बसलेल्या आरतीच्या मेंदूला मार लागला. ती बेशुद्ध झाली. त्यानंतर काही वेळ पुन्हा शुद्धीत आली. सनी व त्याच्या घरच्यांना आरतीच्या अपघाताबद्दल कळताच ते तातडीने भाईंदरला धावले. तिथे स्थानिक रुग्णालयात आरतीवर उपचार सुुरु असताना आरती परत कोमात गेली. तिला जसलोक रुग्णालयात हलविण्यात आले. तिथे ती सहा महिने कोमात होती. त्यावेळी सनी पवार हा रात्रंदिवस तिच्यासोबत होता. आरतीची मनोभावे शुश्रूषा करुन मैत्रीचे नाते निभावत होता. ती कोमातून त्यानंतर बाहेर आली तेव्हा तिच्या स्मरणशक्तीवर परिणाम झाला होता. आरतीची अवस्था दोन वर्षांच्या बाळासारखी होती. अशा अवस्थेत ती सुमारे साडेतीन वर्ष जगली. त्या सर्व काळात सनी पवार तिच्या सोबत सावलीसारखा राहिला. आरतीवर उपचार चालू असताना तिच्या स्थितीबद्दल वृत्तवाहिन्यांवरुन वहिदा रहेमान यांना माहिती मिळाली. त्यांनी सनी पवारला दूरध्वनी करुन अारतीच्या उपचारांसाठी आर्थिक मदत देण्याची इच्छा व्यक्त केली पण आपण कोण बोलतोय हे वहिदा रहेमान यांनी सनी पवार कधीही कळू दिले नाही. वहिदा रहेमान यांच्याकडून नियमितपणे आरतीवरील उपचारांसाठी विशिष्ट आर्थिक मदत मिळत होती. आरतीचे निधन झाल्यानंतर वहिदा यांना खूपच वाईट वाटले. त्यांनी ज्यावेळी गरीब व गरजू लोकांना मदत करण्यासाठी मिनिम ही संस्था सुरु केली त्यावेळी त्यांनी आवर्जून सनी पवारला मदतीसाठी आपल्या सोबत घेतले. सनी पवार व आरती यांच्यावर आरती हा मराठी चित्रपट बनविण्यास वहिदा रहेमान यांनीच दिग्दर्शिका सारिका मेने हिला प्रोत्साहन दिले.
No comments:
Post a Comment